Munur á mótmælum og asnaskap

Þetta náttúrulega kann engri lukku að stýra. Það er vonandi að sem flestir segi sínar skoðanir, skrif, skeggræði og mótmæli allt hvað þeir geta.

Mæti á þingpalla og ræði við alþingismenn að vinnudegi þeirra loknum, skrifi þeim bréf, hringi í þá, sendi þeim táknræn skilaboð og gjafir, stofni blöð og allt hvað fólki dettur í hug.

En svona fíflaskapur í siðmenntuðu samfélagi er ekki töff. 

Ólæti á þingpöllum

Athugasemdir

[Eva Hauksdóttir (IP-tala skráð) 8.12.2008 kl. 15:49]

Í augnablikinu man ég ekki eftir neinum mótmælum sem einhverjir hafa ekki dæmt sem fíflagang.

Veist þú einhver dæmi þess að íslenskur ráðherra hafi sagt af sér vegna bréfaskrifa og táknrænna gjafa?

[Aliber, 8.12.2008 kl. 15:52]

Mikið asskoti ertu farin að verða gleymin Eva. Ekki voru hinir almennu mótmælafundir á Austurvelli dæmdir sem fíflagangur, eða borgarafundurinn, eða mótmælagöngur síðustu árin. Ég hef eingöngu heyrt dæmi eins og það að brjóta upp hurðina á lögreglustöðinni eða partýið á pöllum ráðhúss Reykjavíkur þegar skipt var um meirihluta í eitthvert skiptið dæmt sem fíflagang.

[ingi (IP-tala skráð) 8.12.2008 kl. 15:53]

Eva, veist þú einhver dæmi þessa að íslenskur ráherra hafi sagt af sér vegna skrílsláta á þingpöllum??

[Eva Hauksdóttir (IP-tala skráð) 8.12.2008 kl. 17:01]

Aliber: Ef þú heldur virkilega að mótmælendur á Austurvelli hafi ekki verið dæmdir þá hefur þú lítið fylgst með bloggheimum.

Ingi: Ekki er næg reynsla komin á skrílslæti á þingpöllum til að hægt sé að afskrifa þá aðferð strax. Það er allavega á hreinu að ráðamenn komust ekki hjá því að heyra í dag þótt þeir geti auðveldlega leitt laugardagsfundina hjá sér.

[Olgeir Engilbertsson (IP-tala skráð) 8.12.2008 kl. 18:03]

Svona skrílslæti eins og í dag eru þeim sem tóku þátt í þeim bara til skammar. Þetta hefði í minni sveit þótt illa upp alið fólk. Þetta lið er að mótmæla því að stjórnvöld geri ekki neitt og svo er á sama tíma verið að spilla vinnufriði á Alþingi. Mér finnst mál til komið að farið verði að dæma eitthvað af óeirðaliðinu til refsingar. Þau gætu þá setið inni með sökudólgunum sem ábyrgð bera á ástandinu í fjármálum þjóðarinnar.

[Aliber, 8.12.2008 kl. 20:08]

Eva,

Í fyrsta lagi: Ég hef fylgst mætavel með bloggheimum og þar fara (sem betur fer) skiptar skoðanir, þeir sem hafa verið á Austurvelli hafa sagt frá því hvernig mótmælin hafa farið friðsamlega fram fyrir utan fáa einstaklinga sem hafa varpað skugga á daginn með eggjakasti og asnaskap

Í öðru lagi: Ég legg ekki endanlegt mat á aðstæður eingöngu byggt á bloggheimum.